രാമേശ്വരം-സാഗരസംഗമഭൂമിയില്‍

കിഴക്കിന്റെ വെനീസിനേയും പുനലൂരിലെ തൂക്കുപാലത്തെയും പിന്നിട്ട് വാഹനം മുന്നോട്ടു കുതിച്ചുകൊണ്ടിരുന്നു. ഇത് ഞങ്ങള്‍ക്ക് വെറുമൊരു ഉല്ലാസയാത്ര മാത്രമല്ല, യാത്രകളെ ദൂരത്തിന്റെ മൈല്‍ക്കുറ്റികള്‍കൊണ്ടല്ലാതെ അനുഭവങ്ങള്‍കൊണ്ടളക്കാനാണ് ഞങ്ങള്‍ക്കാഗ്രഹം. അതിനാല്‍ ഓരോ യാത്രയും ഞങ്ങളില്‍ പലവിധ സ്വാധീനങ്ങള്‍ ചെലുത്തിയിരുന്നു. ഓരോ തവണത്തെപ്പോലെയും വ്യത്യസ്തങ്ങളായ ജീവിതാനുഭവങ്ങള്‍ നേരിട്ടുകാണാന്‍ തന്നെയായിരുന്നു ഞങ്ങള്‍ സുഹൃത്തുക്കളുടെ ഈ യാത്രയും. ദക്ഷിണേന്ത്യയിലെവിടെ യാത്ര ചെയ്താലും രാമേശ്വരത്ത് എത്തുമ്പോള്‍ ഉണ്ടാകുന്നൊരു അനുഭൂതി നമുക്കുണ്ടാകില്ല. ഇവിടെ പ്രകൃതി രണ്ടേ രണ്ടു നിറങ്ങളാല്‍ നമ്മെ അമ്പരപ്പിക്കുന്നു; മണലിന്റെ വെണ്‍മയും കടലിന്റെയും ആകാശത്തിന്റെയും നീലയും. […]